ديارى بو يێن خو گورى دكه‌ن، داكو سه‌ركرده‌ پێڤه‌بچن

سەید ئەکرەم

سه‌ركردێن سياسيێن كورد، وى وه‌حشێ نه‌يارتيێ، ژناڤا هزرێن خۆ پاڤێژن، ژه‌نگارا ناڤا دلێ خو پاقژ بكه‌، ده‌ست ژوێ خه‌نجه‌رێ به‌ردن، ياهه‌وه‌ ئاراسته‌ى پشتا برايێن خويێن كورد كرى.....!!

كه‌و هه‌ڤگورێ كوردايه‌ و نه‌يارێ توخمێ خويه‌، كه‌وتاسبێ سه‌رێ خويه‌، كرمێ دارێ، ژدارێ نه‌بيتن، فه‌نابونا دارێ نيه‌، گاپله‌ تێشكێن خو دفسينن، حه‌فتيار تێشكێن خو دخوتن...ئه‌ڤه‌ هنده‌ك گوتنێن پێشيانه‌، زانا و مه‌زن و خودان سه‌ربورێن گه‌لێ مه‌ وه‌كى، سروه‌ت و سامانه‌ك بومه‌ لپاش خو بجههێلانه‌، ژمێژدا ژى كوردا گوتيه‌، په‌ند و سه‌ربورێن دێروكا كوردا، زانا بومه‌ لپاش خودا هێلايين، ئه‌گه‌ر لبير بينين و مفاى ژێ وه‌رگرين، ئێدى كورد نه‌پێتڤى چ ياسا و نه‌ژى پێتڤى چ شێوردارايه‌‌، چونكى گوتن و سه‌رپێهاتيێن كوردا، مشتاخه‌كا زه‌نگين و مشتى سه‌ربورن، هه‌مى وار و ده‌ليڤێن، ژيانا كوردا بخوڤه‌ دگرن، باشترين ماموستا و باشترين رێبه‌ر و پسپورن و رێنيشانده‌رن، بو كورد و بو كوردستانيان، يا فه‌ره ئه‌م ڤان په‌ند و گوتنێن مه‌زنا بكه‌ين گهارك و بكه‌ينه‌ گوهێن خو، بكه‌ينه‌ ستڤانكو و بكه‌ينه‌ گه‌رده‌نا خۆ، كارپێ بكه‌ين و تاقيكرنێن ژيانا خوپێ زه‌نگين و سه‌نگين بكه‌ين، تاكو بساناهى بشێن، ژ ئاسته‌نگ وژ ته‌نگه‌زارێن ژيانێ قورتال و سه‌ر راست دببين و بسه‌لامه‌تى بژين.

دابێينه‌ سه‌ربابه‌تێ خۆ، دێرۆك باشترين شاهده‌ بۆ كورد و بۆ كوردستانى و بۆ هه‌مى دونيايێ، كوردستان زه‌نگينترين و كه‌ڤينترين وه‌لات و شارستانيه‌ته‌ ل دونيايێ، هه‌رديسانێ ئه‌ڤ وه‌لاته‌ وه‌لاتێ كوردايه‌ و كورد بمهاجرى نه‌هاتينه‌ ڤى وه‌لاتى، ئه‌رێ گه‌لا بو چى ژ هه‌رچار ئاليێن وه‌لاتێ مه‌، هێرش دهێنه‌ سه‌ر مه‌ و هه‌ركه‌سێ هاتيه‌ سه‌ر وه‌لاتێ مه‌ ژى، بويه‌ خودان ده‌وله‌ت، لێ بتنێ كورد ماينه‌ بێ ده‌وله‌ت، به‌لێ كورد كونها زێده‌ى چل مليون كه‌سانه‌ و ل سه‌ر ئاخا خو، بێ ده‌وله‌ت دژين، گه‌لا ئه‌گه‌ر چيايێن كوردانه‌، لێ ديسان دبێژن، بتنێ چييا هه‌ڤالێن كوردا نه‌ و چيا كورد پاراستينه‌، ئه‌گه‌ر ژينگه‌ و جوگرافيا كوردانه‌، لێ بۆ چى گه‌لێن غازى، شيانه‌ دڤێ ژينگه‌هێ و ل سه‌ر ڤێ جوگرافيێ ده‌وله‌تا خو دروست بكه‌ن، ئه‌گه‌ر نه‌ژاد و كه‌ساتيا مروڤێ كورده‌، ئه‌رێ بۆ چى خه‌لكێ بيانى و داگيركه‌ر، شياينه‌ بڤى نه‌ژادى و بڤێ كه‌ساتيا مروڤێ كورد، سنورا ده‌رباز بكه‌ن و ده‌وله‌تان داگير بكه‌ن و بخو ژى ده‌وله‌تێ پێ دروست بكه‌تن....!!

كورد ئه‌گه‌ر سيارێ كورسيكێ بۆ، كورسيك بۆ ملكێ وى، فه‌هم ناكه‌تن بێتن خارێ، دونيا هه‌مى بو ملكێ وى، هه‌مى خه‌لك ژى دڤێتن بو وى خزمه‌تكار بيتن، دێ بيتن سێبه‌را خوداى و خوكه‌تن وه‌كيلێ خوداى و خوپيروز بينيتن...دبێژن ژى، كوردى گه‌ل به‌رپرسيارى وه‌رگرت، زێده‌ى سيبه‌را خۆ كه‌سێ دى نابينيتن، هزرێن وى دێ كورت و چربن، زێده‌ى دفنا وى ناچن و دێ بيتن مروڤه‌كێ هزر په‌نگيياى، كورد بشارستانيه‌تا خويا گوندى، گه‌ل چو باژێرى و بو خودان شارستانيه‌ت، دێ وێ شارستانيه‌تێ وێران كه‌تن، چونكى هه‌ريێ برسيه‌، ژملك و ئه‌ملاك و پاره‌وسه‌رومالى تێرنابيتن....!!

هه‌مى زانا و دانا و شاره‌زايێن كوردا، بۆ كوردا ڤه‌گێرايه‌ و ئێشا وان دايه‌ خويا كرن و گوتيێ، كوردا ئێشاته‌ د ته‌فريقه‌ و ژێك چوونا ته‌دايه‌، كوردينا ئێك بگرن و ده‌رمانێ نه‌خوشياوه‌ ئێك گرتنه‌، گه‌ر دێ مه‌ هه‌بوايه‌ ئيتفاقه‌ك...چه‌ندى تورك و عه‌ره‌ب و عه‌جه‌مان ژ مه‌را دكر خولامى...هه‌مى دوستێن كوردا ژى، ڤێ شيره‌تێ لمه‌ دكه‌ن، هه‌مى كورد و كوردستانى ژى، رۆژانه‌ ڤێ دبێژن و ڤێ ڤه‌دگێرن، لێ يه‌كێتى هه‌ر دروست نابيتن، كورد ئێك ناگرن...گه‌لا ئه‌ڤه‌ خه‌تايا دێرۆكێيه‌، ئه‌ڤه‌ دوعايه‌كه‌ ده‌يباب و به‌ره‌بابكا لمه‌كرى، ئه‌ڤه‌ فاله‌كه‌ نه‌ياران بومه‌ ڤه‌كرى، ئه‌ڤه‌ نه‌عله‌ته‌كه‌ خوداى و چێكه‌رێ ئه‌رد و ئه‌سمانان دايه‌....ئه‌گه‌ر چيه‌، چاره‌ چيه‌، كورد چ بكه‌ن...!!

هزرمه‌ند، زانا و دانا، پسپور و شاره‌زا، زانستێن ده‌رونى و هزرى...وه‌سان ڤه‌دگێرن و بنه‌جهژى دكه‌ن، خه‌لك يان ژى جه‌ماوه‌ر، وه‌كى كه‌ره‌كێ په‌زييه‌، د بارێ وه‌همێ و خه‌يالێ دايه‌، بێ هوشه‌ و ئه‌قدارى دگه‌ل دانينه‌...بتنێ پێتڤى شڤانه‌كيه‌، پێتڤى سه‌ركرده‌يه‌ك‌، پێتڤيه‌ سه‌ركێشيه‌كێ لێ بكه‌تن‌....وان ل دورێن خو خرڤه‌ بكه‌تن، ل دويڤ خو بكه‌تن رێز و سه‌ركێشييان وانان بكه‌تن، ئه‌گه‌ر بسه‌ر هه‌لبو، هزرێن وان دخودا ئالياندن، بيرێن وان ل دويڤ خۆ خشاندن...هه‌ما چاوان سه‌ركێشى كر، ئه‌ودێ وه‌سان چيتن، به‌رێ وان دا چ رێك و رێبار، ئه‌و دێ بوێ رێك و رێبارێ دا چن، چونكى ئه‌و دێ بنه‌ ئاويز و ئاليه‌ت لبه‌ر ده‌ستێ وى و به‌رێ وان دا خرابيێ دێ خرابيێ كه‌ن و به‌رێ وان دا باشيێ دێ باشيێ كه‌ن...يانى خه‌لك نه‌به‌رپرسياره‌ ژ ره‌شێ، ژداگير كرنێ، ژ كوله‌تى و چه‌ته‌گه‌ريێ، ژ خرابى و ژ خرابكاريێ....به‌لكى يێ به‌ر پرس ژ ڤان هه‌مى ره‌ش و سه‌ده‌مان، به‌رپرسيار و سه‌ركرده‌نه‌، سياسى و سه‌روه‌رن، به‌راهى و سه‌ركێشن...يانى هه‌مى كه‌ڤتن و بن ده‌ستى و كوله‌واريێن كوردا، به‌راهى و سه‌ركێشێن وانن و ژ نه‌ژادێ وانن... سيارى كورسيكێ دبن و ناهێنه‌ خار، دبنه‌ به‌رپرس و خو ژبير دكه‌ن، زه‌نگين دبن و دبنه‌ خودان ملك ومال و قه‌د تێرنابن، هه‌رچ دز و خرابكاره‌ ل دورێن خو خرڤه‌ دكه‌ن، دا دزيا بو بكه‌ن، مه‌دحوسه‌نايا بو بكه‌ن، خرابيێن وان ل به‌رچاڤێن وان جوان بكه‌ن، راستا په‌چپ بكه‌ن و چه‌پان راست بكه‌ن، سپييان ره‌ش بكه‌ن و ره‌شان سپى بكه‌ن...!!

دێ گه‌لا ته‌ماشاى پارت و سه‌ركردێن خو بكه‌ن، دێروك و سه‌ربورێن دێرۆكێ چ زوى ژبير كرن، پێشمه‌رگه‌ كرنه‌ پاشمه‌رگه‌ و جاشمه‌رگه‌ كرنه‌ پێشمه‌رگه‌ و په‌هله‌وان، لا يه‌كێ مه‌ تيرۆرا داعشه‌، لايێ دى تيرۆرا ئه‌ردوغانيه‌، لايێ سيێ تيرۆرا حه‌شدالشه‌عبيه‌، كيميا بارن ژبير كرن، هه‌له‌بچه‌ ژبير كرن، ئه‌نفال و ره‌ڤێن مليونى ژبير خو برن....كوشتارگه‌ها ل كوبان و شه‌نگالا وێران، پرسوس و ديار به‌كر و جزيره‌ و فارقينێ...هێشتا خوينا وان زه‌ها نه‌بوى، پارچێن له‌شێ مروڤان ل كولانان ماينه‌، ل هه‌ر جهولايێن وه‌لاتى، تالان و وێرانى و مال خرابى و هجره‌ت و غوربه‌تى و گرتن و كوشتنه‌...ل ده‌مه‌كى، هێزێن ناڤده‌وله‌تى، بسه‌دان ته‌نێن ئاسن و ساروخان بسه‌ر سه‌رێ نه‌يارێن مه‌ وه‌ردكه‌ن، پشت و په‌نا مه‌ دگرن، شيره‌ت و ياباش بومه‌ دبێژن....ل ئاليێ دى، پێشمه‌رگه‌ و شه‌رڤان رۆژانه‌ خوينێ دده‌ن، خو گورى مه‌ دكه‌ن، داستانێن مێرانه‌ تومار دكه‌ن...پێشمه‌رگه‌ گه‌ريلا هه‌مبێز دكه‌ن، گه‌ريلا پێشمه‌رگه‌ى هه‌مبێز دكه‌ن، هه‌مى خه‌لكێ كورد و كوردستانى، داخازيا يه‌كێتى و يه‌كگرتن و براتيا يه‌ك دوو دكه‌ن...لێ به‌ختێ ره‌شێ كوردا، قه‌ده‌را كوردا، مخابن سه‌ران و سه‌ركرده‌ يێن پله‌ئێك و پله‌دوو...ژه‌هرێ درێژن، دووبه‌ركيێ دروست دكه‌ن، دووسه‌ريێ دكه‌ن، كورد و كوردستانيا دكه‌نه‌ نه‌يارێن ئێك دوو....دزى و تالان كرن به‌س نه‌بوون، پاوان خازى و تاپوكارى به‌س نه‌بوون، به‌رپرسيارى و مه‌زناهى به‌س نه‌بوون...يێ نه‌يارتيا گه‌ل و وه‌لاتێ خودكه‌ن، يێ دبنه‌ خزمه‌تكارێن گه‌ل و وه‌لاتێ خو، يێ گازێ بئاگرى دا دكه‌ن، ناهێلن ئه‌ڤ وه‌لاته‌ ره‌حه‌ت بيتن و ئه‌ڤ گه‌له‌ بئارامى بژيتن...سه‌ران و سه‌ركرێن كورد، نه‌رتيا گه‌ل و وه‌لاتى بلا به‌س بيتن...ده‌م ده‌مێ براتى و يه‌كگرتن و حه‌ز ژێ كرنێيه‌، ئێك بگرن و حه‌ز ژێك بكه‌ن...دا وه‌لات و هاووه‌لاتێن هه‌وه‌، بگه‌هن كه‌نارێ ئاشتيێ و ببن خودان ده‌وله‌ت و ده‌ستهه‌لاته‌كا خومالى هه‌بيتن، بماف و ئازاديێن خۆ شاد و كه‌يف خوش بن.