خۆپیشاندانی قوتابیان بۆ؟

سوهه‌یل تاهیر..

ماوەی چەند رۆژێكە قوتابیان بە شێوەیەكی هێمنانە لە زۆربەی شارو شارۆچكەكانی هەرێمی كوردستان وەك نارەزاییەك بۆ رێنماییەكان و بڕیارەكانی وەزارەتی پەروەردەی حكومەتی هەرێمی كوردستان ، بەتایبەتی رێنماییەكانی ئەزموونەكانی پۆلەكانی 10 و 11ی ئامادەیی و سیستەمی كۆرسات و ئەو نمرانەی كە بۆ پۆلی 12ی ئامادەیی هەژمار دەكرێت بەپێی رێنماییەكان ، دەرژێنە سەر شەقامەكان و بەردەم پەروەردەكانیان . لێرە ئەوەی تێبینی دەكرێت و جێگەی پرسیارە ئایا بۆ ؟؟؟
پرۆسەی خوێندن و هەموو ئامادەكارییەكان لە دابین كردنی پێداوستی قوتابخانە لە كتێب و دابینكردنی مامۆستا و بینایەی قوتابخانە بۆ كێیە ؟ ، ئایا بۆ قوتابیان و خوێنكاران نییە ؟؟ . ئایا وەزارەتی پەروەردە نابێت بپرسێت ئایا بۆ قوتابیان لە گەڵ ئەو رێنماییانە نیین ، نابێت پێداچوونەوەك بەم رێنماییانەوە بكات ، چاوەڕوانی چی دەكات ؟؟ ، كاتێك كار لە كار ترازا و نارەزاییەكانی قوتابیان بەردەوام بوو و كارەساتی لێكەوتەوە ، ئەوكات وەڵامی قوتابیان و خوێندكاران دەداتەوە ؟؟
سیستەمی نوێی پەروەردەی هەرێمی كوردستان راستە تا رادەیەكی زۆر گۆرانكاری تێدا كراوەو بەشێكی زۆری ئەم گۆرانكارییانەش خاڵی ئەرێنیین و جێگەی خۆشحاڵی هەموو لایەكە ، بەڵام كاتێك هەست بە كەموكوڕییەك دەكرێت پێویستە دەستبەجێ وەزارەتی پەروەردە هەوڵی چارەسەركردنی بدات . ئەوەی لە قوتابیانەوە دەبیسترێت حیساب كردنی ئەو نمرانەی كە كۆدەكرێنەوە بۆ پۆلی 12ی ئامادەیی بە شێوەیەكی عادیلانە لەلایەن مامۆستایانی قوتابخانەكانەوە دانانرێت ، قوتابخانە هەیە لە ناو شارەكان كە قوتابخانەی دیارن ، میلاكی قوتابخانەكانیان تەواوە و خوێندن تیایدا سەركەوتووە و مامۆستای بە توانای تێدایە ، نمرەكانی قوتابیان بە رێك و پێكی دادەنرێت ، بەڵام لە هەندێ قوتابخانەی دیكە بەتایبەتی لە شارۆچكەو لادێكان كە بە دەست كەمی میلاكەوە دەناڵێن و مامۆستاكانیان وەكو پێویست مامەڵە لە گەڵ ئەم سیستەمە ناكەن ، ئەوەیە دەبێتە هۆی ناعەدالەتی و نارەزایی قوتابیان و خوێندكاران . ئایا وەزارەتی پەروەردەو دەزگا پەیوەندیدارەكانی سەر بەم وەزارەتە بەدواداچوونیان لە سەر ئەم كەمو كوڕییانە كردووە . بەرای زۆر لە قوتابیان و خوێندكاران پێشنیاری ئەوە دەكەن كە كۆرسەكانی پۆلەكانی 10 و 11ی یەكەم و دووەم كۆبكرێتەوە و دابەشی دوو بكرێت هەر وەك لە قۆناغی بنەرەتی پەیرەو دەكرێت و هیچ نمرەیەكیش بۆ پۆلی 12 كۆنەكرێتەوە و بەهەمان شێوە لە پۆلی 12ی ئامادەیی نمرەكانی هەردوو كۆرس كۆبكرێتەوەو دواتر رێنمایی دەربكرێت كە قوتابی چۆن و بە چ شێوەیەك مافی بەشداربوونی دەبێت لە تاقیكردنەوەی وەزاری . زۆر ئاساییە كە قوتابیانی پۆلی 12ی ئامادەیی لە ناوەراستی مانگی 4 تاقیكردنەوەی كۆرسی دووەم ئەنجام بدەن و دواتر ئاگادار بكرێنەوە كە كام قوتابی و خوێندكار مافی بەشدار بوونی لە ئەزموونی وەزاریدا هەیە كە دواتر لە كۆتایی مانگی 5 بەشداری ئەزموونەكە دەكات .
هەر دامو دەزگایەك كاتێك بڕیارو راسپاردەو رێنمایی دەردەكات و پاشان ناڕەزایی لێدەكەوێتەوە ، راپرسییەك لە نێو نێوەندەكانی دامو دەزگاكانی خۆی بكاتەوە بۆ ئەوەی ئەو بڕیارانەی كە دەدرێت لە بەرژەوەندی زۆربەی خەڵكیدا تەواو بێت . نەك تەنها لە لایەن چەند بەرپرسێكەوە ئەم جۆرە بابەتە هەستیارانە تاوتۆی بكرێت كە چارەنووسی بەشێكی زۆری خەڵكی لە سەر بەندە ، بەتایبەتی چینی قوتابیان و خوێندكاران كە نەوەی دوارۆژی ئەم كوردستانەن . هیوادارم و ئومیدیش دەخوازم كە وەزارەتی پەروەردە زۆر زانستیانەو بوێرانە بە دواداچوون لە سەر ئەم مەسەلەیە بكاتەوە بڕیاری پێویست بدات كە لە بەرژەوەندی تێكڕای قوتابیان و خوێندكاران تەواو بێت.