دادوەرێکی سەر بە یەکگرتوو لەدەربەندیخان زەردەشتییەکی سزادا

پێنوسەکان....

ڕۆژی ٧/١٢/٢٠١٤  حاکم سەڵاح، دادوەری دادگای دەربەندیخان، سەربە پارێزگای سلێمانی، بەپێی ماددەی ( ٣٧٢) یاسای سزادانی عێراق، سزای گرتن و داگایی کردنی بۆ  ( یوسف محەمەد عەلی) یەکێك لەئەندامانی ئەنجومەنی باڵای زەردەشتیانی کوردستان دەرکرد.

شایانی باسە ( یوسف محەمەد عەلی) کە ئێستا لە زیندانی معەسکەرسەلامە، لە تۆڕی کۆمەڵایەتی فەیس بوکی خۆی ڕەخنەی لە دەقەکانی قورئانی ئیسلام گرتوە و بە لێکدانەوەی نازانستیانەی داناوە. پاش ئەوەی هەڕەشەی کوشتنی لەلایەن چەند ئیسلامییەکی توندڕەوەوە لێکرا، ئەویش بۆ پاراستنی گیانی خۆی سکاڵای تۆمار کرد. کەچی بەپێچەوانەوە حاکم سەڵاح بەهۆی ئەوەی خۆی ئەندامێکی کارا و پێگەی سیاسیی حیزبیی سەر بەیەکگرتووە بەتاوانی سوکایەتیکردن بە ئاین و پیرۆزییەکان، زیندانیی کردووە.

ئێمە، لەدەزگای پێنوسەکان هەموو لایەك لەهەڵگیرسانی فیتنەیی و ئاژاوەنانەوە  لەڕێگای ئیسلامییە توندڕەوەکانەوە لە ناو هەرێمی کوردستاندا ئاگادار دەکەینەوە و بەهەوڵی تێکدانی ئاسایشی هەرێمی دەزانین و ئەم سزادانە بەشێکە لەسازاکانی ( دژە ئازادی). هەروەها، دەزگای پێنوسەکان، ئەم بڕیارەی دادگای دەربەندیخان و بەتایبەت ( حاکم سەڵاح) کە بێلایەن نییە و سەر بە حیزبێکی سیاسیی ئیسلامیی توندڕەوە، بۆ گرتن و زیندانی کردنی هاوڵاتی یوسف محمد علی بەهۆی ڕەخنەگرتنی لە دین بە پێشێلکردنی مافی مرۆڤ لە ئازادی ڕادەربڕیندا دەزانین و بەتوندی مەحکومی دەکەین و داوا دەکەین کە ئەو سزایە هەڵبوەشێندرێتەوە و داوای دەستبەجێ ئازادکردنی دەکەین. بەپێچەوانەوە، لەهەموو ناوەندە جیهانییەکان، سکاڵا لەسەر ( دادوەرەکە و  پەرلەمان و حکومەتی هەرێم) تۆمار دەکەین و تەواوی ناوەندە جیهانییەکان لەو پێشێلکارییە ئاگادار دەکەینەوە.

هەر لەدەزگای پێنوسەکانەوە داوا لەهەموو لایەك دەکەین، دەستبەکار بن بۆ گۆڕینی ئەم یاسا شوومە کە هۆکارێکە بۆ ڕێگە گرتن لە ماف و ئازادیی بیرکردنەوە و گوتن.

 

ئەمەی خوارەوە چاوپێکەوتنێکە لەڕادیۆی پێشەنگ کەلە زیندانەوە لەگەڵیدا ساز دراوە:

https://soundcloud.com/radioypeshang-1/t8uf1vfpdcv0